Yeni Dehlidəki partlayış terror aktı kimi tanındı

Hindistan hökuməti Yeni Dehlidəki tarixi "Qırmızı Qala" yaxınlığında avtomobildə baş verən partlayışı terror aktı kimi tanıyan qətnamə qəbul edib.

Bu barədə Hindistanın Baş naziri Narendra Modinin ofisi Nazirlər Kabinetinin təhlükəsizlik məsələləri üzrə iclasından sonra məlumat yayıb.

Məlumatda qeyd olunub ki, ölkə "Qırmızı Qala" yaxınlığında avtomobilin partladılması ilə antimilli qüvvələr tərəfindən törədilən dəhşətli terror aktının şahidi olub.

Nazirlər Kabineti bu hadisənin bütün icraçıları, iştirakçıları və maliyyəçilərinin tez bir zamanda müəyyən edilərək məsuliyyətə cəlb olunması üçün maksimum təcili və peşəkar şəkildə araşdırma aparılmasını tapşırıb. Vurğulanıb ki, vəziyyət hökumət tərəfindən ən yüksək səviyyədə daimi nəzarətdə saxlanılır.

Qeyd edək ki, noyabrın 10-da axşam saatlarında Hindistanın paytaxtında "Qırmızı Qala" metrostansiyasının yaxınlığında avtomobil partlayıb. Son məlumatlara görə, hadisə nəticəsində 13 nəfər həlak olub, 20-dən çox insan isə yaralanıb. Terror aktının araşdırılması Milli İstintaq Bürosuna həvalə edilib.