Yeni səfir Moskva-İrəvan münasibətlərini necə dəyişdirəcək? | Türkiyəyə qarşı isə...

Keçmiş deputat Qurgen Arsenyan Ermənistanın Moskvadakı yeni səfiri olub. Rəsmi versiyaya görə, bu, Rusiya ilə münasibətlərdə yaranmış gərginliyi azaltmaq məqsədi daşıyır.

“Nyus.ru” da Moskvaya yeni təyin olunan diplomatın iki ölkə arasında münasibətləri yumşalda bilib-bilməyəcəyini öyrənməyə çalışıb.

Məqalədə qeyd olunub ki, 64 yaşlı Q.Arsenyan dörd dəfə parlamentin deputatı olub və əvvəllər bizneslə, o cümlədən bank işi ilə məşğul olduğu üçün ən zəngin deputatlardan biri hesab olunurdu. Səfirin 17 daşınmaz əmlakı və dörd avtomobili var. Hətta bəzi erməni saytları Q.Arsenyanın yaxın vaxtlara qədər Rusiyada bizneslə məşğul olmasına dair məlumatlar da dərc edib.

Xəbərə görə, yeni səfir sentyabrın əvvəlində Moskvada işə başlayacaq.

Ermənistan Demokrat Partiyasının lideri və keçmiş parlament üzvü Aram Sarkisyan isə mediaya açıqlamasında bildirib ki, yeni səfir Rusiya ilə münasibətləri inkişaf etdirməyə hazır olması barədə açıq danışacaq, lakin çətin ki, onun təyinatı münasibətlərin yaxşılaşmasından xəbər verəcək.

“O, Ermənistanla Rusiya arasında münasibətləri acınacaqlı vəziyyətə salan siyasi qüvvəni təmsil edir. Bu səbəbdən səfirin nə edəcəyi barədə mühakimə yürütmək olar”, – deyə A.Sarkisyan bildirib.

Müəllif deputat olarkən Q.Arsenyanın parlamentdə çıxışına da diqqət çəkib. Keçmiş millət vəkili bəyan edib ki, Rusiyanın Cənubi Qafqazda hərbi mövcudluğu Ermənistanın təhlükəsizliyinin təminatı deyil və ümumiyyətlə, bu mövcudluq əbədi deyil.

Bundan başqa, yeni səfir Türkiyəyə müsbət münasibəti ilə də seçilir. O, Ankara ilə münasibətlərin istiləşməsinin mümkünlüyünə açıq-aşkar eyham vurub.

Müəllif sonda onu da vurğulayıb ki, son bir ildə siyasətçi Rusiyaya qarşı açıq-aşkar bəyanatları dayandırıb. Bu səbəbdən deputat Q.Arsenyan ötən ilin payızında Beynəlxalq Cinayət Məhkəməsinin Roma Statutunun ratifikasiyasına səs verməyib.