Yeni vaksin neçə ştamın təsirindən qoruya bilər? | Qripə yoluxma sayı bu yolla azalacaq

Amerikalı alimlər quşları, donuzları və hətta insanları yoluxduran təhlükəli A qripi ştammlarından qorumağa qadir olan “Epigraf” adlı innovativ peyvənd hazırlayıblar.

Tədqiqat “Nature Communications” elmi jurnalında dərc olunub.

Altı ay davam edən sınaqlar nəticəsində uzunmüddətli immun cavab müşahidə edilib ki, bu təsirin on ilədək davam edəcəyi proqnozlaşdırılır.

Yeni vaksinasiya strategiyası son yüz il ərzində yaranmış 6000-dən çox qrip ştammının kompüterləşdirilmiş analizinə əsaslanır.

Xüsusi olaraq hazırlanmış “Epigraf” adlı proqram təminatı virusun immun sistemi tərəfindən tanınan və reaksiya doğuran hissələri ‒ epitopları müəyyənləşdirib. Bu da daim mutasiyaya uğrayan ştammlara qarşı effektiv olan “universal” preparatın yaradılmasına imkan verib.

Donuzlar üzərində aparılan testlər göstərib ki, “Epigraf” peyvəndi 2009-cu ilin pandemik H1N1 daxil olmaqla, 12 müxtəlif ştamma qarşı qoruma təmin edir. Peyvəndin xüsusilə dəyərli cəhəti onun zoonoz, yəni heyvanlar və insanlar arasında yoluxmanı əngəlləyə bilmə qabiliyyətidir.

Tədqiqatçılar insanlar arasında ən geniş yayılmış H1 və H3 ştammlarına qarşı peyvəndin testlərini genişləndirməyi planlaşdırırlar. Uğurlu nəticələr illik vaksinasiya ehtiyacını aradan qaldıra və dünyada qripə yoluxma hallarını əhəmiyyətli dərəcədə azalda bilər.