Yerdə gözlənilməz hadisə | Quraqlığın bilinməyən təsirləri üzə çıxdı

Quraqlıq sadəcə qurumuş torpaq demək deyil. Alimlər su itkisinə torpağın necə reaksiya verdiyini və yer səthinin dinamik quruluşunu araşdıraraq maraqlı nəticələr əldə ediblər.

Təbiətin gizli mexanizmləri bəzən alimləri belə təəccübləndirəcək nəticələr doğurur.

Bonn Universitetinin yeni araşdırması Cənubi Afrikada torpaq quruluşunda gözlənilməz bir dəyişikliyi ortaya çıxarıb: hər il yer səthində iki millimetrədək yüksəlmə baş verir. Tədqiqatçılar bu yüksəlmənin səbəbinin geoloji hərəkətlər yox, su itkisi olduğunu bildirirlər.

Əldə olunmuş məlumatlar spektral analiz üsulu ilə incələnib. Müəyyən edilib ki, yeraltı su azaldıqca, torpaq səthinə təsir edən təzyiq də azalır və nəticədə torpaq yuxarı qalxmağa başlayır. Bu proses sıxılmış və sonra sərbəst buraxılmış süngərin davranışına bənzəyir.

Cənubi Afrikada torpağın yüksəlməsi təbiətin mürəkkəb və heyrətamiz mexanizmlərinə bir nümunədir. Su itkisi ilə torpaq hərəkətləri arasındakı bu incə əlaqə iqlim elmi və geologiya sahələrində yeni tədqiqatların əsasını qoya bilər.