Yüzlərlə rusiyalı öldürüldü | Rusiya-Ukrayna savaşında gərginlik artır

Rusiya və Ukrayna arasında şiddətli döyüşlər qeydə alınıb.

Oktyabrın 19-da Rusiyanın hava hücumundan müdafiə qüvvələri ABŞ istehsalı olan 3 HIMARS raketini zərərsizləşdirib. Bundan başqa, 2 idarə olunan aviabomba və 323 pilotsuz uçuş aparatı məhv edilib. 

Oktyabrın 20-də isə Ukraynaya aid 7 dron vurulub. PUA-lar Krım, Bryansk, Lipetks və Ulyanovsk səmasında zərərsizləşdirilib. Rusiya Ordusu Donetsk və Zaporojyedə iki yaşayış məntəqəsini ələ keçirib.

Ukrayna Silahlı Qüvvələrinin Baş Qərargahından verilən məlumata görə, sutka ərzində Rusiya Ordusunun 890 hərbçisi məhv olunub. Rusiya Ordusu Dnepropetrovsk vilayətinə dron hücumu edib. Əsas hədəflər nəqliyyat infrastrukturu və PUA hazırlanan obyektlər olub. 

Ukrayna Ordusu isə Rusiyanın daha bir neft emalı zavodunu atəşə tutub. Samaradakı zavodda yanğın qeydə alınıb, dəyən ziyanın məbləği açıqlanmayıb.

Orenburqda isə qaz emalı zavodu və yanacaq anbarı hücuma məruz qalıb. Rusiyanın nəzarətində olan Ukrayna ərazilərində də bəzi obyektlər atəşə tutulub.

Ukrayna Silahlı Qüvvələrinin Baş Qərargahından verilən məlumata görə, neft-qaz emalı zavodlarına hücumların məqsədi Rusiya Ordusunun yanacaq təminatına mane olmaqdır.