Zaporojyedə Hərbi Adminstrasiya rəhbəri son vəziyyəti açıqladı

Son aylar Rusiya-Ukrayna müharibəsində Zaporojye vilayəti istiqamətində döyüşlər daha da kəskinləşib.

Bu, Ukrayna Silahlı Qüvvələrinin əks-hücum əməliyyatları fonunda baş verir. Əməliyyatlar əsasən cənub cəbhəsini əhatə etsə də, ekspertlərin gözlədiyi nəticələr baş vermədi.

Zaporojye vilayətinin hərbi administrasiyanın rəhbəri Yuri Malaşko son hərbi əməliyyatlar barədə Baku TV-yə danışıb.

“Əgər sentyabr ayı ilə müqayisə etsək, bizim ərazilərimizin atəşə tutulması 2 dəfə artıb. Sutkada orta hesabla təxminən 130-150 zərbə endirilir. Amma çox vaxt yaşayış məntəqələri atəşə tutulur. Gün ərzində orta hesabla 20-30 fərdi ev dağılır”, – deyə o qeyd edib.

Yuri Malaşkonun sözlərinə görə, müharibə başlayandan bəri Oryexovda 26-sı uşaq olmaqla, 437 nəfər ölüb, 1500-dən çox insan yaralanıb. Təxminən 50 nəfər itkin düşüb:

“Vilayətdə indiyədək 8 mindən çox bina dağılıb. Ukrayna Silahlı Qüvvələri vilayətin 4 yaşayış məntəqəsini azad edib. Bütün cəbhə boyunu nəzərə alsaq, heç bir istiqamətdə sadə vətəndaşların sərbəst keçməsi üçün yer yoxdur. Üstəlik, həmin ərazilər minalanıb. Biz insanlara digər ərazilərimizə üçüncü ölkələr vasitəsilə keçməyi tövsiyə edirik. Bu yolla gələn insanlar da var”.

Qeyd edək ki, raket zərbələri oktyabrın 19-na keçən gecə də davam edib. Nəticədə Zaporojye şəhərinin özündə çoxmənzilli bir yaşayış binası dağılıb, 4 nəfər mülki insan ölüb, xeyli sayda yaralananlar var.