Zaxarova “1 gülləyə 2 quş vurmaq” istədi | Rusiyanın hədəfləri ifşa olundu

“Brüssel maliyyə fırıldaqları vasitəsilə İrəvanda öz təsirini gücləndirməyə çalışır”.

Bunu Rusiya Xarici İşlər Nazirliyinin rəsmi nümayəndəsi Mariya Zaxarova deyib.

“İrəvandan soruşmaq lazımdır: onlar bu pulları alıb, yoxsa yox?”, ‒ deyə o bildirib.

Mariya Zaxarovanın sözlərinə görə, Rusiya Brüsselin Ermənistana nə qədər pul ayırdığını yoxlamaq niyyətində deyil, lakin Qərb həmişə “səxavətli vədlər verir” və bu yolla üçüncü ölkələrdə öz təsirini möhkəmləndirir.

Mariya Zaxarovanın bu açıqlaması 2 məqsədə xidmət edir. Birincisi, Ermənistan-Avropa İttifaqı münasibətlərinin güclənməsi Rusiyanı narahat edir. Ermənistan Avropaya inteqrasiya ilə Rusiya və onun orbitinə daxil olan təşkilatlardan qopmağa hazırlaşır. Bu isə Moskvanı qıcıqlandırır. Buna görə Mariya Zaxarova Avropanın da bostanına daş atıb ki, Brüssel ölkələrə yalançı vədlər verir.

Mariya Zaxarovanın digər məqsədi isə Ermənistandakı vəziyyəti daha da gərginləşdirməkdir. Hazırda Paşinyan Rusiyanın təlimatı ilə Ermənistana gəlmiş oliqarx Samvel Karapetyan və kilsə ilə kəskin münaqişə içindədir. Buna görə Karapetyan və bəzi arxiyepiskoplar həbs olunub. Parlamentdəki müxalif deputatlar arasında da tutulanlar var. Amma digərləri də hökumətə qarşı korrupsiya ittihamları səsləndirməyə çəkinmir.

Mariya Zaxarovanın “Ermənistan Avropanın verdiyi pulları alıb, yoxsa?” sualı da korrupsiya ittihamlarını daha da qabartmağa xidmət edir.

Prezident Vladimir Putinin mətbuat katibi Dmitri Peskovun ardınca Mariya Zaxarovanın da oxşar fikirlər səsləndirməsi onu göstərir ki, Moskva İrəvanın Qərbə doğru yolunu kəsmək istəyir. Bu, hələ ki diplomatik xəbərdarlıqla məhdudlaşır, amma Rusiyanın Gümrüdəki bazaya silah-sursat yığmasını nəzərə alsaq, deyə bilərik ki, Ermənistana qarşı hərbi müdaxilə də istisna deyil.