Zaxarovadan Rusiya vətəndaşlarına qoyulan qadağaya reaksiya | Moskva hərəkətə keçir?

“Moskva Rusiya vətəndaşı Andranik Miqranyanın Ermənistana girişinə qadağa qoyulmasını “tamamilə qeyri-dost addım” kimi qiymətləndirir”.

Bunu Rusiya Xarici İşlər Nazirliyinin rəsmi nümayəndəsi Mariya Zaxarova dekabrın 18-i keçirdiyi brifinqdə bildirib.

“NEWS.ru”nun sualını cavablandıran Zaxarova qeyd edib ki, Rusiya məsələ ilə bağlı Ermənistan hakimiyyətindən izahat tələb edir:

“Bu, ikitərəfli münasibətlərin müttəfiqlik statusuna ziddir. Biz dərhal ikitərəfli diplomatik kanallar vasitəsilə İrəvana müraciət edərək izahat istədik. Biz əvvəllər də erməni tərəfdaşlarımızı hansısa səbəblərdən Ermənistan hakimiyyətini qane etməyən Rusiya vətəndaşlarının ölkəyə buraxılmaması kimi çirkin təcrübəyə son qoymağa çağırmışıq. Rəsmi İrəvan durmadan demokratiyadan danışır, əməldə isə bunun tam əksini göstərir. Bəli, bundan sonra da mövzu ilə bağlı sualları rəsmi İrəvanın qarşısına qoyacağıq”.

Rusiya XİN rəsmisinin sözlərinə görə, ölkə hökumətinin daim demokratiya və fikir plüralizminə sadiq olduğunu bəyan etməsini nəzərə alsaq, İrəvanın bu cür münasibəti təəccüb doğurur.