Zelenski ərazi güzəştinə razı salındı? | ABŞ görüşü necə keçdi?

Ağ Evdə ABŞ, Ukrayna və avropalı liderlərin görüşü keçirilib. Öncə Tramp-Zelenski danışıqları baş tutub.

Bağlı qapılar arxasında keçirilən danışıqlardan əvvəl Oval kabinetdə Ukraynanın 1992-2013-cü illər sərhədləri ilə böyük xəritəsi qoyulub. Xəritə danışıqlar masası ilə üzbəüz yerləşdirilib, Rusiyanın nəzarətində olan regionlar fərqli rənglərlə işarələnib.

Ardınca keçirilən görüşə ABŞ və Ukrayna liderləri ilə yanaşı, Fransa Prezidenti Emmanuel Makron, Böyük Britaniyanın Baş naziri Kir Starmer, Almaniya Kansleri Fridrix Merts, İtaliyanın Baş naziri Corcia Meloni və Avropa Komissiyasının Prezidenti Ursula fon der Lyayen qatılıb.

Tərəflər Moskva ilə Kiyev arasında sülh sazişinin tezliklə bağlanacağına ümid etdiklərini bildiriblər.

ABŞ Prezidenti Donald Tramp Rusiya və Ukrayna liderləri Vladimir Putinlə Volodimir Zelenskinin ortaq dil tapa biləcəklərinə ümid etdiyini deyib. O həmçinin Putin və Zelenski ilə üçtərəfli görüşün baş tutacağına əminliyini ifadə edib.

Öz növbəsində Ukrayna Prezidenti Volodimir Zelenski ABŞ və Rusiyadan olan həmkarları ilə üçtərəfli görüşdə ərazi məsələlərini müzakirə etməyə hazır olduğunu açıqlayıb.

Zelenski həmçinin Trampla danışıqları çox yaxşı adlandırıb və bildirib ki, ABŞ Ukraynaya təhlükəsizlik zəmanəti verməyə hazır olduğuna dair siqnallar verir.