Zelenski ilə Tramp arasında növbəti telefon danışığı olub

Ukrayna Prezidenti Volodimir Zelenski amerikalı həmkarı Donald Trampla baş tutan telefon danışığının detallarını açıqlayıb.

Zelenski bu barədə öz "Telegram" kanalında yazıb.

"ABŞ Prezidenti Donald Trampla danışdım. Söhbətə Trampın xüsusi nümayəndələri Stiv Uitkoff və Cared Kuşner də qoşuldular. Hazırda komandalarımız çox çalışır və mən bütün səylərə, müharibənin dayandırılması ilə bağlı danışıqlara bu cür cəlb olunduqlarına görə onlara təşəkkür etdim", – deyə o bildirib.

"Cenevrədə nümayəndələrimizin ikitərəfli görüşdə üzərində işləyəcəkləri məsələləri, eləcə də martın ilk günlərində danışıqlar aparan komandaların tam tərkibdə üçtərəfli formatda növbəti görüşünə hazırlığı müzakirə etdik", – deyə Zelenski əlavə edib.

Ukrayna Prezidenti bu danışıqların liderlər səviyyəsində görüşün təşkil edilməsinə imkan yaradacağına ümidvar olduğunu bildirib.

"Prezident Tramp bu cür addımlar ardıcıllığını dəstəkləyir. Bütün mürəkkəb və həssas məsələləri həll etməyin və nəhayət müharibəni bitirməyin yeganə yolu budur", – deyə Zelenski vurğulayıb.