Zelenski ilk dəfə müharibədəki itkiləri açıqladı

“Rusiya ilə müharibə başlayandan bəri 31 min ukraynalı əsgər həlak olub”.

Bunu Ukrayna Prezidenti Volodimir Zelenski mətbuat konfransında deyib.

Qeyd edək ki, bu, 2022-ci ilin fevralın 24-dən bu günə qədər itkilərlə bağlı rəsmi olaraq açıqlanan ilk statistikadır.

“31 min ukraynalı hərbçi müharibədə həlak olub. Vladimir Putinin dediyi kimi, 300 min, ya da 150 min nəfər həyatını itirməyib. Rəqəmlərin sayından asılı olmayaraq, bu itkilərin hər biri bizim üçün önəmlidir.

Rusiya tərəfindən isə 180 min nəfər ölüb, 500 minə yaxın yaralı var. Bizim tərəfimizdə neçə yaralının olduğunu isə deməyəcəyəm, çünki bu vasitə ilə Rusiya döyüş meydanını neçə nəfərin tərk etdiyini başa düşə bilər. Mən isə buna icazə verməyəcəyəm”, – V.Zelenski qeyd edib.

Məlumat üçün bildirək ki, ABŞ-nin itkilərlə bağlı hesablamaları ilə ukraynalı liderin açıqlaması arasında ciddi təzad var. Belə ki, rəsmi Vaşinqtonun rəqəmlərinə görə, 70 minə yaxın ukraynalı hərbçi müharibədə həlak olub, 120 min nəfər isə yaralanıb.

Rəsmi Moskvanın itkilərinə gəldikdə isə ABŞ-nin statistikasına görə, Rusiya bu münaqişədə 315 minə yaxın hərbçisini itirib. Onu da qeyd edək ki, Kreml tərəfindən itkilərlə bağlı hələlik heç bir rəsmi açıqlama verilməyib.