Zelenski Lukaşenko ilə telefon zəngindən danışdı | Bu, onun sözləridir, şahidlərim var…

Ukrayna Prezidenti Volodimir Zelenski genişmiqyaslı müharibənin ilk günlərində Aleksandr Lukaşenko ilə telefonla danışdığını və sonuncunun Rusiyanın Belarus ərazisindən Ukraynaya raket hücumlarına görə üzr istədiyini deyib.

Bu barədə Ukrayna lideri alim və bloger Leks Fridmana müsahibəsində danışıb.

V.Zelenskinin sözlərinə görə, A.Lukaşenko ona cavab olaraq Mozır neft emalı zavoduna zərbə endirməyi təklif edib.

“Savaş başladıqdan bir neçə gün sonra A.Lukaşenko ilə telefonla danışdım və o, həmin vaxt məndən üzr istədi. A.Lukaşenko mənə “Bu mən deyiləm, sadəcə ərazimdən raketlər buraxılıb. O raketləri Vladimir Putin buraxıb” dedi. Bu onun sözləridir, şahidlərim var.

Mən A.Lukaşenkoya V.Putin kimi qatil olduğunu dedim. O, cavabında “Başa düş, sən ruslarla döyüşə bilməzsən” dedi. Mən isə ona “Biz heç vaxt döyüşməmişik. Raketlər sizin torpağınızdan, Belarusdan gəldi, buna necə icazə verdiniz?” deyə sual verdim. O “Yaxşı, sən də cavab ver. Mozırda neft emalı zavodunu vur, bunun mənim üçün nə qədər dəyərli olduğunu bilirsən” dedi. Cavabında mən “Sən nə danışırsan? Cavab nədir?” söylədim”, – deyə Ukrayna lideri maraqlı məlumatı çatdırıb.