Zelenski Qərbə od püskürdü | Ukrayna Prezidentindən sərt ittiham

Kiyevdə sanksiyalarla bağlı keçirilən beynəlxalq konfransda çıxış edən ölkə prezidenti Volodimir Zelenski sensasiyalı açıqlamalar verib.

Baku TV-nin Şərqi Avropa bürosunun verdiyi məlumata görə, o, sanksiyalara baxmayaraq bəzi ABŞ və Avropa şirkətlərinin hələ də Rusiyanı avadanlıqlarla təchiz etdiyini bildirib.

“Mütəxəssislərimiz artıq Rusiyanın PUA və raketlərində istifadə olunan yüzlərlə müxtəlif növ komponentləri qeydə alıblar. Təəssüf ki, təkcə son bir ildə Rusiyadan bizə atılan dron və raketlərdə Çin, Tayvan, Cənubi Koreya, Yaponiya, Fransa, Almaniya, İtaliya və Amerika Birləşmiş Ştatları da daxil olmaqla dünyanın ən azı 12 ölkəsindən hərbi sənaye məhsulları qeydə alınıb. Planlaşdırılan tədarük müqavilələri haqqında da məlumatımız var. Rusiyanı qara yollarla təmin edirlər”, – deyə o qeyd edib.

V.Zelenski bildirib ki, bu cür əməllər mütləq dayandırılmalıdır. O həmçinin Rusiyaya ixracı və neft nəqlini davam etdirməyə şərait yaradan ölkələrə qarşı əlavə təzyiq tədbirlərinə ehtiyac yarandığını düşünür.