Zelenski Rusiya ilə müharibə fonunda dron istehsalını 20 milyona çatdıracaqlarını açıqladı - Baku TV

“Ukrayna hazırda ildə 10 milyon dron istehsal edir. Bu göstərici yaxın gələcəkdə 20 milyona çatdırılacaq”.

Belə bir açıqlama ilə Ukrayna Prezidenti Volodimir Zelenski çıxış edib.

“Bir vaxtlar dövlətin ildə 1 milyon dron istehsal edəcəyi planını açıqlayanda buna çoxları şübhə ilə yanaşırdı. İndi isə deyə bilərik ki, ildə 10 milyon dron istehsal edirik. Gələcəkdə isə 20 milyon olacaq”, – deyə Zelenski əlavə edib.

“Ukraynada “İstəklilər Koalisiyası” ölkələrinin hərbi kontingentlərinin yerləşdirilməsi Rusiya üçün qəbuledilməzdir və belə qüvvələr Rusiya Ordusu üçün qanuni hərbi hədəf hesab olunacaq”. Bu fikri Rusiya Xarici İşlər Nazirliyinin rəsmi nümayəndəsi Mariya Zaxarova səsləndirib.

Onun sözlərinə görə, Moskva bunu xarici hərbi müdaxiləyə hazırlıq kimi qiymətləndirir və bu cür çoxmillətli qüvvə qanuni hərbi hədəf hesab olunacaq.

Ağ Ev rəhbəri Donald Tramp isə Ukraynadakı müharibənin prezidentlik müddəti bitməmiş başa çata biləcəyini bildirib. O, “Fox News” telekanalına müsahibəsində deyib ki, Vladimir Putin razılaşma əldə etməyə hazırdır və bu, yaxın zamanda baş verəcək.

Qeyd edək ki, Trampın prezidentlik müddəti 2029-cu ildə başa çatır.