Zelenski Türkiyədən Azov döyüşçüləri ilə qayıdıb

“Azovstal” metallurgiya zavodunun müdafiəsinə başçılıq edən bütün ukraynalı komandirlər Rusiya əsirliyindən azad edildikdən sonra Türkiyədən Ukraynaya qayıdıblar.

Bu barədə Ukrayna Prezidenti Volodimir Zelenski “Telegram”da bildirib.

“Biz Türkiyədən vətənə qayıdırıq və qəhrəmanlarımızı vətənə aparırıq”, – deyə dövlət başçısı yazıb.

Rəsmi Moskva isə bunu mövcud razılaşmaların şərtlərinin pozulması kimi dəyərləndirib.

Rusiya Prezidentinin mətbuat katibi Dmitri Peskovun sözlərinə görə, “Azov” döyüşçülərinin Türkiyədən Ukraynaya qayıtması mövcud müqavilələrin şərtlərinin birbaşa pozulmasından başqa bir şey deyil. Üstəlik, bu halda şərtlər həm Ukrayna, həm də Türkiyə tərəfindən pozulub.

D.Peskov bildirib ki, razılaşmaya əsasən, bu şəxslər münaqişə bitənə qədər Türkiyədə qalmalı idilər. O həmçinin qeyd edib ki, azovçuların təhvil verilməsi ilə bağlı Rusiyaya heç kim məlumat verməyib.

Kreml rəsmisi eyni zamanda vurğulayıb ki, Türkiyə Ukrayna Silahlı Qüvvələrinin əks-hücum əməliyyatında uğursuzluqları fonunda, eləcə də NATO-nun Vilnüs sammiti ərəfəsində bu addımı atmağa məcbur olub. “Ankara da öz növbəsində alyans üzvləri ilə həmrəylik nümayiş etdirir. Rusiya bunu çox yaxşı başa düşür”, – deyə D.Peskov əlavə edib.

Xatırladaq ki, mayın 20-də 81 günlük mühasirədən sonra Mariupolun müqaviməti sona çatıb. Şəhərin müdafiəsində əsas qüvvə ölkənin “Azov” alayı olub.