Zelenski və Putin Türkiyədə görüşəcək? - Savaş başlayandan bəri ilk dəfədir ki...

“Rusiya ilə atəşkəsin olub-olmamasından asılı olmayaraq, Ukrayna Prezidenti Volodimir Zelenski mayın 15-də Türkiyəyə səfər edəcək”.

Bu barədə “Axios” Ukrayna rəsmilərinə istinadla məlumat yayıb.

Nəşr xatırladır ki, mayın 10-da Zelenski və bir sıra NATO ölkəsinin liderləri ABŞ Prezidenti Donald Trampla telefonla danışıb və bazar ertəsi günündən başlayaraq qeyd-şərtsiz 30 günlük atəşkəsə hazır olduqlarını vurğulayıblar. Söhbət zamanı onlar Trampa məlumat veriblər ki, atəşkəs razılaşması əldə olunarsa, Ukrayna Rusiya ilə birbaşa sülh danışıqlarına başlamağa hazırdır.

Həmin gün axşam saatlarında Putin şərtlərə cavab verib. O, atəşkəs təklifini qəbul etməsə də, cümə axşamı Ukrayna ilə birbaşa danışıqlara başlamağa hazır olduğunu bildirib.

Bundan sonra Tramp Ukrayna Prezidentini bu şərtləri qəbul etməyə çağırıb. O vurğulayıb ki, Ukrayna bu danışıqlarda iştirak etsə, razılaşmanın mümkün olub-olmadığını müəyyən edə biləcək. Əks halda, Avropa və ABŞ işlərin necə getdiyini biləcək və buna uyğun reaksiya verəcək.

Nəşr yazır ki, görüş baş tutsa, bu, Rusiyanın Ukraynada müharibəsi başlayandan bəri iki lider arasında ilk görüş olacaq.

Ukraynalı bir rəsmi “Axios”a Rusiya atəşkəsə başlamağa razı olmasa belə, Zelenskinin cümə axşamı Türkiyədə olacağını söyləyib.