Zelenski və Tramp arasında vacib danışıq | Nələr müzakirə edildi?

Ukrayna Prezidenti Volodimir Zelenski amerikalı həmkarı Donald Trampla telefon danışığını ən yaxşı söhbət kimi qiymətləndirib və qarşı tərəflə dronların istehsalı üzrə birgə işin gücləndirilməsi barədə məlumat verib.

Bunu Ukrayna lideri videomüraciətində bildirib.

“Yəqin ki, bütün bu müddət ərzində ən yaxşı, maksimum məhsuldar söhbət idi. Biz Hava Hücumundan Müdafiə mövzusunu müzakirə etdik və mən kömək etmək hazırlığına görə minnətdaram. Məhz “Patriot” ballistikadan müdafiənin açarıdır”, − deyə o bildirib.

V.Zelenskinin sözlərinə görə, onlar daha bir neçə vacib məsələni müzakirə edib ki, bunları Ukrayna-ABŞ komandaları yaxın vaxtlarda keçiriləcək görüşlərdə ətraflı işləyəcəklər.

“Biz ABŞ ilə dronlarla bağlı birgə işin əhəmiyyətli dərəcədə artırılması barədə razılığa gəldik. Həftə ərzində Ukrayna Müdafiə Nazirliyi və aparıcı ABŞ şirkətlərindən biri arasında müqavilə imzalanıb. Bu, Ukraynaya bu il daha yüz minlərlə pilotsuz təyyarə verəcək”, − deyə dövlət başçısı bildirib.