Zelenski vəliəhd şahzadə ilə görüşdü | Diqqətçəkən məqamlar

Ukrayna Prezidenti Volodimir Zelenski Səudiyyə Ərəbistanının vəliəhd şahzadəsi Məhəmməd bin Salmanla görüşüb.

O, görüşün həm regional, həm də beynəlxalq məsələlər baxımından yaxşı keçdiyini bildirib.

“Şahzadənin hazırkı vəziyyətə müdrik baxışına və Ukraynaya verdiyi dəstəyə görə minnətdaram. Onun Ukraynanın gələcəyinə inamını eşitmək bizim üçün çox vacib idi”, – deyə lider sosial şəbəkə hesabında yazıb.

V.Zelenski Məhəmməd bin Salmanın əsl sülhün əldə olunması üçün rolunu yüksək qiymətləndirib:

“Biz müharibəni bitirmək və davamlı sülhü təmin etmək üçün lazım olan addımları və şərtləri ətraflı müzakirə etdik. O, məhbusların azad edilməsinin vacibliyini vurğuladı. Söhbətimizin əsas hissəsi Ukraynanın təhlükəsizlik təminatlarına yönəlmişdi”.

O həmçinin Səudiyyə Ərəbistanının iqtisadi əməkdaşlığı genişləndirmək və Ukraynaya sərmayə qoymağa hazır olduğunu deyib: “Ukraynanın yenidən qurulmasında ortaq imkanlar görürük”.

Onu da bildirək ki, Kiyev son günlərdə Rusiya ilə sülhün əldə olunması üçün səylər göstərir. Tərəflərin razılığa gəlməsi yönündə görüş və iclaslar keçirilir.