Zelenskidən avropalı tərəfdaşlarına ismarıc | Hücumlara reaksiya lazımdır

“Tərəfdaşlarımızın Rusiyanın hücumlarına geniş reaksiya verməsi vacibdir”.

Bunu Ukrayna Prezidenti Volodimir Zelenski Rusiyanın paytaxt Kiyev daxil olmaqla bir sıra şəhərlərə təşkil etdiyi kütləvi hücumlara dair “Telegram” kanalında etdiyi paylaşımda bildirib.

O qeyd edib ki, bu hücumlarla Rusiya Ukraynaya daha çox ağrı verməyə çalışır.

“Bu, Putinin dünyanı sınağa çəkməsinin açıq göstəricisidir. O, görmək istəyir ki, bunu qəbul edəcəklərmi, yoxsa dözəcəklərmi. Məhz buna görə də liderlərin, dövlətlərin və beynəlxalq qurumların bəyanatlarının Rusiyaya qarşı sanksiyalarla, Rusiya ilə əlaqəli şəxslərə qarşı tədbirlərlə, sərt tariflər və digər ticarət məhdudiyyətləri ilə müşayiət olunması vacibdir”, ‒ deyə Zelenski bildirib.

Ukrayna lideri qeyd edib ki, Putin danışıqları istəmir, açıq şəkildə bundan yayınır, buna görə də Rusiyanın yanacaq çatışmazlığı və digər iqtisadi problemləri atəşkəsə və ya liderlər səviyyəsində görüşə razılaşmaqdan imtinanın məntiqli cavabıdır.