Zelenskidən Rusiyanın genişmiqyaslı hücumu ilə bağlı xəbərdarlıq

"Rusiyanın bu il mayın sonu və ya iyunda Ukraynaya qarşı yeni genişmiqyaslı hücuma keçməsi gözlənilir".

Bunu Ukrayna Prezidenti Volodimir Zelenski ABŞ-nin "CBS News" telekanalına müsahibəsində deyib.

O bildirib ki, silah-sursat çatışmazlığı ilə üzləşən Ukrayna müdafiəçiləri bu hücuma hazır deyil və Qərbin göndərəcəyi silahlara ehtiyacı var.

Zelenski Rusiyanın tükənməz raket ehtiyatları və mərmilərinin bəzi kəndləri məhv etdiyini əlavə edib.

"Bizim mərmilərimiz, artilleriya mərmilərimiz yoxdur. Bizim yardıma indi ehtiyacımız var", – deyə Zelenski bildirib.

Ukrayna Prezidenti vurğulayıb ki, onun qüvvələri Rusiyanın hücumunu dayandırsa da, növbəti genişmiqyaslı hücuma qarşı müdafiəyə hazır deyil. O, Rusiyanın xüsusilə də uzaqvuran artilleriya imkanlarının Ukrayna ilə müqayisədə daha yaxşı olduğunu etiraf edib.

"Baxmut, Avdeyevka, Lisiçansk, Soledar və digər yerlərdə artilleriya mərmisinin vuruş məsafəsi 20 kilometrdən çox olan düşmənə qarşı döyüşmək həqiqətən də çətin idi, bizim artilleriyamız isə 20 kilometrdən qısa məsafəyə atəş açır", – deyə Zelenski qeyd edib.

O, Ukraynanın daha çox "Patriot" hava hücumundan müdafi sisteminə və artilleriyaya ehtiyacı olduğunu əlavə edib.