Zelenskinin rədd cavabı necə nəticələnəcək? - Əsas məqsəd budur ki...

Macarıstanın Baş naziri Viktor Orban ölkəsinin Avropa İttifaqı Şurasına sədrliyi müddətində ilk olaraq Ukraynaya səfər edib.

Bildirib ki, Macarıstanın sədrliyinin məqsədi təşkilat qarşısında duran problemlərin həllinə töhfə verməkdir. Ona görə də ilk səfəri Kiyev olub.

Baş nazir Ukrayna Prezidenti Volodimir Zelenski ilə söhbət zamanı onu atəşkəs əmrini nəzərdən keçirməyə də çağırıb. Səfəri bitər-bitməz ölkəsinə qayıdan V.Orban yerli telekanala müsahibə də verib:

“Əgər atəşkəs əldə olunsaydı, bu, sülh danışıqlarını sürətləndirməyə şans yaradardı. Davam edən müharibənin sonlandırılması Avropa üçün ən vacib məsələdir. V.Zelenski hərbi əməliyyatların dayandırılması təklifini rədd edir. Bu da Moskvanı yenidən silahlanmağa vadar edir.

İlk növbədə mən V.Zelenskinin atəşkəs elan edilməsinin mümkünlüyü ilə bağlı fikrini öyrənmək istədim, hətta məhdud müddətə. Bu, iki, üç, ya da dörd həftə də ola bilərdi və bu da o deməkdir ki, bu atəşkəs dövründə biz sülh prosesi ilə bağlı danışıqları sürətləndirə bilərik. O isə şübhələrinin olduğunu, əslində bunu bəyənmədiyini, əvvəlki atəşkəslərlə bağlı pis təcrübəsi olduğunu söylədi”.

Məlumat üçün bildirək ki, iyulun 1-də Avropa İttifaqı Şurasına sədrlik Macarıstana keçib. Bu, bir sıra Aİ ölkələrində və Avropa qurumlarında Ukrayna hadisələri, Kiyevə hərbi yardım və Rusiyaya qarşı sanksiyalarla bağlı xüsusi mövqeyinə görə rəsmi Budapeştin kəskin tənqidi ilə müşayiət olunub.