16 yaşlı oğlan anası ilə birgə yaşadığı şəxsi öldürməkdə ittiham olunur - Baku TV

Bakıda anasının qeyri-rəsmi yaşadığı şəxsı bıçaqlayaraq qətlə yetirməkdə təqsirləndirilən 16 yaşlı Əli Səfərovun (şərti ad) cinayət işinin məhkəmə araşdırması yekunlaşıb.

Bakı Ağır Cinayətlər Məhkəməsində hakim Roman Ələkbərlinin sədrliyi ilə baş tutan sonuncu iclasda dövlət ittihamçısı çıxış edib.

Prokuror təqsirləndirilən yeniyetmənin 10 il müddətinə azadlıqdan məhrum edilməsini məhkəməyə təklif edib. Müşavirədən sonra hökm elan edilərək Əli Səfərov 9 il azadlıqdan məhrum edilib.

Qeyd edək ki, hadisə 2025-ci ilin sentyabrında Bakının Ramana qəsəbəsində baş verib. Qəsəbədə yaşayan Emil Əliyevin öldürülməsi barədə hüquq-mühafizə orqanlarına məlumat daxil olub. Aparılan araşdırmalar nəticəsində müəyyən edilib ki, Emil Əliyev qeyri-rəsmi nikah münasibətində olduğu qadının 16 yaşlı övladı tərəfindən bıçaq zərbələri vurulmaqla qətlə yetirilib.

Təqsirləndirilən azyaşlının məhkəmədə verdiyi sərbəst ifadələrindən məlum olub ki, hadisənin baş verməsinə səbəb mərhum Emil Əliyevin evdə spirtli içki qəbul etdikdən sonra onun anasına qarşı nalayiq ifadələr işlətməklə ona qarşı zor tətbiq etməsi olub. Anasına qarşı olan bu hərəkətlərdən hiddətlənən Əli mətbəxdən bıçağı götürərək Emil Əliyevə bir neçə zərbə yetirib.

Faktla bağlı Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanılaraq ona müvafiq ittiham irəli sürülüb.