3 saylı uşaq evində nə baş verir? | Hadisə ilə bağlı rəsmi açıqlama

Paytaxtda 3 saylı uşaq evində qotur xəstəliyi yayılıb.

Sosial şəbəkələrdə adı müxtəlif qalmaqallarda hallanan uşaq müəssisəsində səkkiz azyaşlının bu diaqnozla Dəri-Zöhrəvi Xəstəxanasında müalicə aldıqları bildirilib.

Məsələ ilə bağlı Tibbi Ərazi Bölmələrini İdarəetmə Birliyindən qeyd olunub ki, oktyabrın 23-də 1 nömrəli Uşaq-Dəri Zöhrəvi Dispanserinə 3 nömrəli uşaq evindən beş uşaqla bağlı müraciət daxil olub:

“Uşaqlar tibb heyəti tərəfindən müayinə olunub və diaqnozu təsdiq etmək üçün laborator analizə yönəldiliblər. Analizlərin nəticələrinə əsasən, uşaqlara qoturluq diaqnozu qoyulub. Pasiyentlər 10 gün müddətində stasionar müalicə aldıqdan sonra laborator müayinələrə əsasən sağalma ilə yenidən uşaq evinə geri göndəriliblər”.

Sosial Xidmətlər Agentliyindən bildirilib ki, qurumun balansındakı müəssisələrdə uşaqların sağlamlığı daim diqqətdə saxlanılır və aidiyyəti səhiyyə qurumları ilə əməkdaşlıq edilir.

Xatırladaq ki, 3 saylı uşaq evi dəfələrlə müxtəlif qalmaqallarla gündəmə gəlib. Sonuncu dəfə oradan 15 yaşlı qızın qaçması barədə xəbər yayılıb. Bundan öncə isə uşaq evində azyaşlının döyüldüyü iddia olunub. Əraziyə gedən çəkiliş qrupuna uşaq evinin sakini hücum çəkib.