Ağcabədidə ailə faciəsinə səbəb olan partlayışla bağlı cinayət işi açıldı

Ağcabədidə baş verən partlayışla əlaqədar Cinayət Məcəlləsinin ehtiyatsızlıqdan iki və ya daha çox adam öldürmə və qanunsuz olaraq döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və ya gəzdirmə maddələri ilə cinayət işi başlanıb.

Bu barədə Baş Prokurorluq məlumat yayıb.

Bildirilib ki, rayonun Hindarx qəsəbəsində evdə əl qumbarasının partlaması nəticəsində 5 nəfər – 66 yaşlı Quliyev Şamiq Əfqan oğlu, 42 yaşlı Quliyev Bəhruz Şamiq oğlu, 10 yaşlı Məmmədli Məhəmməd Vidadi oğlu, 7 yaşlı Məmmədli Murad Vidadi oğlu, 7 yaşlı Quliyev Natiq Namiq oğlu həlak olub. 40 yaşlı Quliyeva Ülviyyə Şamiq qızı və 10 yaşlı Quliyeva Aysun Namiq qızı isə müxtəlif dərəcəli bədən xəsarətləri alıb.

Faktla bağlı ibtidai istintaq aparılır.