Ağdamda ürəkağrıdan ailə faciəsi | "Sevinə-sevinə aparmışdı, dəhşət yaşadıq..." - Baku TV

Ağdam rayonunun Xaçındərbənd kəndində baş verən hadisə bütün kənd sakinlərini dərindən sarsıdıb.

Belə ki, ailə faciəsinə səbəb olan hadisə ata və iki övladının su anbarında boğularaq ölməsi ilə nəticələnib.

Mərhumun qohumu Şəmsi İsgəndərov hadisə ilə bağlı Baku TV-yə açıqlama verib.

“Uşaqlarının universitetə daxil olmasına sevinirdi. Onları gəzməyə aparmışdı. Balaca uşaq suya düşüb. Anası da onu çıxarmaq üçün arxasınca qaçıb. Atası da qaça-qaça gəlib, geyimlərini soyunaraq suya atılıb. Onların ikisini də çıxarıb xilas edib, amma özü boğulub. Oğlu gəlib baxıb ki, atası boğulur, onu çıxarmaq istəyib. Amma ikisi də qucaqlaşıb batıblar. Bacısı da gəlib suya düşüb, elə orada yanaşı batıblar. Üç uşağı var idi: iki oğlan, bir qız. İndi oğlanların yalnız biri sağ qalıb”, – deyə o bildirib.

Qeyd edək ki, iyulun 4-də 41 yaşlı Şərif İsgəndərov, oğlu 18 yaşlı Tunar və qızı 17 yaşlı Fidan Xaçınçay su anbarında boğularaq dünyasını dəyişiblər.