“Anası qışqırdı ki, qan töküldü...” | Sumqayıtda dəhşət | Qardaş qardaşı niyə bıçaqladı? - Baku TV

Sumqayıtda qardaşlar arasında baş verən mübahisə qanla nəticələnib.

Hadisə şəhərin 17-ci mikrorayonunda yerləşən yataqxanada qeydə alınıb.

Bildirilib ki, münaqişə zamanı Zəfər Qubadov qardaşı Cəfər Qubadov tərəfindən bıçaqlanıb. Yaralı dərhal Sumqayıt Şəhər Təcili Tibbi Yardım Xəstəxanasına çatdırılıb.

Hadisə şahidi olan qonşunun sözlərinə görə, şübhəli şəxs ruhi xəstə olub və həmin an özündə olmayıb.

“Ruhi xəstədir, ağlı başında deyildi. Polislər gəldi, əlində bıçaq var idi, hətta polis əməkdaşlarının üzərinə cumurdu. Birtəhər onu apardılar. Anası qışqırırdı ki, qan töküldü. Qonşular yaralıya yardım edib yarasını bağladılar. Daha sonra təcili yardım çağırdıq, polis əməkdaşları da gəlib onu apardılar”, – deyə qonşu bildirib.

Hadisəni törətməkdə şübhəli bilinən digər qardaş polis əməkdaşları tərəfindən saxlanılıb. Faktla bağlı araşdırma aparılır.