Arvadı ilə bağlı uyğunsuz videonu görəndə... | Gözətçinin direktoru bıçaqlamasının pərdəarxası

Astara şəhər 6 nömrəli tam orta məktəbin direktoru Ülviyyə Bayramova məktəbin gözətçisi Halik Əli oğlu Nəcəfov tərəfindən bıçaqlanıb.

Məlum olub ki, Halik Nəcəfov bir müddət əvvəl məktəbdə katibə işləyən və direktorla aralarında yaranan münaqişəyə görə bu ilin aprel ayında tutduğu vəzifədən uzaqlaşdırılan Validə Məmmədovanın həyat yoldaşıdır. Direktorla keçmiş katibəsi arasındakı mübahisə "işə qəbul"ə görə yaranıb və mübahisə məhkəməyə qədər gedib çıxıb.

Ülviyyə Bayramova ağır vəziyyətdə Astara Rayon Mərkəzi Xəstəxanasına çatdırılıb və ilkin tibbi yardım alandan sonra o, Lənkəran Rayon Mərkəzi Xəstəxanasına hospitalizasiya olunub.

Cinayət əməlini törətməkdə şübhəli bilinən 40 yaşlı Halik Nəcəfov polis əməkdaşları tərəfindən saxlanılıb. Faktla bağlı Cinayət Məcəlləsinin müvafiq maddəsi ilə cinayət işi başlanılıb, araşdırma aparılır.

Astara rayonunun “Gənc Alimlər” təşkilatından verilən məlumatda cinayətin təfərrüatları açıqlanıb.

Məlumata görə, direktor bir neçə ay öncə öz katibəsinin montaj edilmiş görüntülərini yayıb:

“Material saxta olsa belə, qadının nüfuzunun sarsılmasına səbəb olub və bıçaqlanma faktına gətirib çıxaran əsas amil də bu olub. Məhz bu porno şantaj hadisəsindən sonra katibə Validə Məmmədova ağır psixoloji sarsıntı keçirib, səhhəti pozulub və 16 aprel 2024-cü ildə Ülviyyə Bayramovanın tələbini qəbul edərək işdən çıxmağa məcbur qalıb”.

“Gənc Alimlər” təşkilatından verilən digər məlumata görə, tərəflər arasında mübahisə məhkəməyə qədər uzanıb. Avqustun 27-də isə Astara Rayon Məhkəməsi Ülviyyə Bayramovanın xeyrinə qərar çıxarıb. Nəticədə katibənin həyat yoldaşı məktəbin gözətçisi işləyən Nəcəfov Halik Əli oğlu affekt vəziyyətinə düşüb və 2024-cü il sentyabrın 1-də məktəbdə olarkən direktor Ülviyyə Bayramovaya münaqişə zəminində bıçaqla xəsarət yetirib.

Direktor Astara Rayon Mərkəzi Xəstəxanasında ilkin tibbi yardım alandan sonra Lənkəran Rayon Mərkəzi Xəstəxanasına aparılıb. Hazırda onun sağlıq durumu barədə dəqiq məlumat verilmir.