Arvadı yazışmasını tutdu, qohumunun gözü önündə... | Bakıda dəhşətli hadisə

“Whatsapp”da başqa qadınlarla danışdığını aşkar edən arvadını 9 bıçaq zərbəsi ilə öldürməyə cəhd edən Elməddin İsmayılovun cinayət işi üzrə məhkəmə prosesi yekunlaşıb.

Ayaz İsmayılov küçəsi, 2 ünvanında baş verən hadisə ilə bağlı Səbail rayon prokurorluğunda Cinayət Məcəlləsinin qəsdən adam öldürməyə cəhd maddəsi ilə cinayət işi başlanılıb.

İstintaqla müəyyən edilib ki, iyunun 9-u saat 21 radələrində kirayə yaşadığı evin yataq otağında olan zaman arvadı Xatın İsmayılova ona digər xanımla münasibətinin olmasını irad bildirməsi səbəbindən sonuncunu öldürmək qərarına gəlib.

Niyyətini həyata keçirtmək üçün qohumu Firəngiz Rasulovanın gözləri qarşısında mətbəxdən götürdüyü məişət təyinatlı bıçaqla Xatın İsmayılovanın döş qəfəsinə və bədənin digər nahiyələrinə çoxsaylı xəsarətlər yetirib.

Qadının ölmədiyini görərək saçından tutub qonaq otağına sürüyüb, başını kəsməkdən ötrü əlindəki bıçaqla boğazına zərbələr vurub. Bu an Firəngiz Rasulova ona mane olub. Yaralı vaxtında xəstəxanaya çatdırılaraq həyatı xilas edilib.

Məhkəmə iclasında Elməddin İsmayılov ittiham üzrə özünü qismən təqsirli bilib. O, hadisə zamanı özündə olmadığını, bıçaqla arvadına cəmi 3 zərbə vurduğunu bildirib.

Bakı Ağır Cinayətlər Məhkəməsinin hökmü ilə cəzasını ciddi rejimli cəza çəkmə müəssisəsində çəkməklə Elməddin İsmayılov 14 il müddətinə azadlıqdan məhrum olunub.