“Arvadımı ağzından tutub hamama saldım ki...” | Bakıdakı qandonduran hadisənin detalları - Baku TV

2022-ci ildə Nəsimi rayonunun Lev Tolstoy küçəsi, 153 ünvanında yerləşən hoteldə cinayət hadisəsi baş verib.

26 yaşlı Rüqayyə Abdullayeva bıçaq xəsarətləri ilə ağır vəziyyətdə Kliniki Tibbi Mərkəzə çatdırılıb. Həkimlərin səyi nəticəsində əməliyyat olunan qadının həyatını xilas etmək mümkün olub.

Hadisədən bir neçə saat sonra Cəlilabad Rayon Polis Şöbəsinə təslim olan 30 yaşlı Tərlan Abdullayev 22-ci Polis Şöbəsi əməkdaşlarına təhvil verilib.

Faktla bağlı Nəsimi Rayon Prokurorluğunda Cinayət Məcəlləsinin 29, 120.1-ci (qəsdən adam öldürməyə cəhd) maddəsi ilə cinayət işi başlanılıb.

Zərərçəkmiş Rüqayyə Abdullayeva ifadəsində göstərib ki, əri Tərlan çox qısqanc olub. Aprelin 4-də telefonla danışanda bu davranışlarından yorulub, ondan ayrılmaq istədiyini söyləyib. Cavab olaraq Tərlan onu və uşaqları öldürməklə hədələyib. İyunun 3-də hoteldə yoldaşı yalvarışlarına məhəl qoymayaraq, ona bıçaqla zərbələr vurub. Boğazını kəsmək istəyərkən ağzını tutduğu əli boşa çıxdığından qışqırıq səsini hotel işçiləri eşidib. Qeydiyyatçı qız içəri girəndə qadın ondan təcili yardım çağırmasını xahiş edib. Kliniki Tibbi Mərkəzə çatdırılaraq əməliyyat olunub.

Məhkəmə iclasında Tərlan Abdullayev ittiham üzrə özünü qismən təqsirli bilib. Zərərçəkmiş təqsirləndirilən şəxslə barışdığını bildirərək, məhkəmədən ona yüngül cəza verilməsini xahiş edib.

Sonda Bakı Ağır Cinayətlər Məhkəməsinin hökmü ilə Tərlan Abdullayev cəzasını ciddi rejimli cəzaçəkmə müəssisəsində çəkməklə 8 il müddətinə azadlıqdan məhrum olunub.