Azərbaycan Universitetində tələbə yıxılaraq xəsarət aldı - Baku TV

Azərbaycan Universitetində birinci kurs tələbəsi təhsil müəssisəsinin zirzəmisində yüngül konstruksiya ilə örtülmüş döşəmənin üzərinə çıxaraq mənfi ikinci mərtəbəyə yıxılıb.

Hadisə ilə bağlı şahidlər Baku TV-yə danışıblar.

“Yerdə 100 manat var idi. Tələbə yoldaşımız onu götürmək üçün döşəmənin üstünə hoppandı. Nəticədə, yıxılaraq əzildi. Təcili tibbi yardım gəldi, onu xəstəxanaya apardılar”, – onlardan biri söyləyib.

Azərbaycan Universitetinin mətbuat katibi Lalə Dilanovanın sözlərinə görə, binanın daxilində iki mərtəbə arasında yüngül konstruksiya ilə örtülmüş döşəmə var:

“Döşəmənin üzərində xəbərdarlıq lövhəsi də qoyulub. Böyük ehtimalla tələbə oranın möhkəm olduğunu düşünərək üstünə hoppanıb. Məsələ ilə bağlı araşdırmalar davam etdirilir”.

Hadisə ilə bağlı Tibbi Ərazi Bölmələrini İdarəetmə Birliyindən (TƏBİB) bildirilib ki, 25 dekabr tarixində saat 11:00 radələrində Respublika Təcili və Təxirəsalınmaz Tibbi Yardım Mərkəzinə Azərbaycan Universitetindən 18 yaşlı şəxsin yıxılması səbəbi ilə çağırış qeydə alınıb:

“Çağırış ünvanına təcili tibbi yardım briqadası cəlb olunub. Təcili tibbi yardım briqadası tərəfindən bir nəfərə (kişi) yerində ilkin tibbi xidmət göstərilib və döş qəfəsinin travması diaqnozu ilə Kliniki Tibbi Mərkəzə hospitalizasiya olunub. Pasiyentə zəruri tibbi xidmət göstərilib və ambulator müalicə üçün evə buraxılıb”.