Azərbaycan vətəndaşı Gürcüstanda niyə saxlanılıb?

Azərbaycan vətəndaşı Gürcüstanda İŞİD terror qruplaşmasının üzvü olmaqda ittiham edilərək saxlanılıb.

Bu barədə Gürcüstanın yerli mətbuatı yazıb. Bildirilib ki, noyabrın 11-i Gürcüstanın Dövlət Təhlükəsizliyi Xidmətinin (DTX) antiterror mərkəzi tərəfindən İŞİD terror qruplaşması ilə əlaqəli olmaqda şübhəli bilinərək saxlanılan iki əcnəbidən biri Azərbaycan, digəri isə Rusiya vətəndaşıdır.

Qeyd olunub ki, onlar Gürcüstan ərazisi ilə qanunsuz olaraq miqrantın başqa ölkəyə köçürülməsi və onun Gürcüstanda qalması üçün müvafiq şəraitin hazırlanması faktı əsasında saxlanılıblar.

Qeyd edək ki, Gürcüstan DTX-nin antiterror mərkəzi noyabrın 11-i Tbilisidə eyni vaxtda iki nöqtəyə basqın edib. Qurumun məlumatına görə, basqın zamanı elektrik şoku cihazları, hərbi vasitələr, saxta sənədlər, əldəqayırma partlayıcı vasitələr və İŞİD simvolları olduğu aşkarlanaraq müsadirə edilib.

Faktla əlaqədar Gürcüstan Cinayət Məcəlləsinin müvafiq maddələri ilə istintaqa başlanılıb.