Azərbaycandan qanunsuz şəkildə Rusiyaya getmək istəyən pakistanlılar saxlanılıb

Noyabrın 21-də Qusar rayonunun Zuxul kəndi yaxınlığında yerləşən sərhəd zastavasının xidməti ərazisində Pakistan vətəndaşları Azərbaycandan Rusiya istiqamətində dövlət sərhədini pozmağa cəhd göstərərkən saxlanılıblar.

Bu barədə Dövlət Sərhəd Xidmətinin Mətbuat Mərkəzindən məlumat verilib.

Araşdırma zamanı saxlanılan əcnəbi vətəndaşların ölkə ərazisinə rəsmi qaydada gəlmələri, dövlət sərhədini pozaraq Azərbaycandan Rusiyaya, oradan isə Avropa ölkələrindən birinə miqrasiya etmək niyyətində olduqları müəyyən edilib.

Fakt üzrə araşdırma tədbirləri davam etdirilir.

Qeyd edək ki, bu, eyni gündə qeydə alınmış ikinci bənzər hadisədir. Bundan əvvəl də digər Pakistan vətəndaşı Balakən rayonunun Poçtbinə kəndi yaxınlığında dövlət sərhədini pozaraq Gürcüstana keçməyə cəhd göstərib.