Bakıda məktəbdə insident: DİN təcili açıqlama yaydı

Bakıda 75 nömrəli məktəbdə şagirdlər arasında bıçaqlanma hadisəsinin baş verməsi ilə bağlı xəbərlər paylaşılıb.

İddialara görə, tənəffüs vaxtı 7-ci sinifdə təhsil alan iki şagird arasında mübahisə yaranıb. Mübahisə zamanı şagirdlərdən biri əlindəki naməlum əşya ilə digər məktəblinin qarın nahiyəsini cızıb.

Məktəbdən verilən məlumata görə, xəsarət alan şagird tibb işçisi tərəfindən yoxlanılıb və ciddi bir xəsarət aşkar edilməyib.

Hadisə ilə bağlı Daxili İşlər Nazirliyi də məlumat paylaşıb. Bildirilib ki, Sabunçu rayonu ərazisində yerləşən məktəblərin birində şagirdin sinif yoldaşına kəsici alətlə daxilə nüfuz etməyən xəsarət yetirməsi barədə polisə məlumat daxil olub. Məktəblinin xəsarət alması ilə əlaqədar onun valideyni ilə birlikdə təhqiqat təmin edilib, zəruri istintaq hərəkətlərinin aparılması məqsədilə araşdırma aparılır.

O da bildirildi ki, hər iki şagirdin valideynləri məktəbə dəvət olunaraq izahatları alınıb. Onların arasında qarşılıqlı anlaşma yaranıb, övladlarına daha ciddi nəzarət edəcəklərini deyiblər.