Bakıda terror törətmək istəyən əfqanıstanlı hakim qarşısına çıxarılır

Azərbaycanda terror aktı planlaşdırmaqda ittiham olunan Əfqanıstan vətəndaşı Favzan Musa Xanın cinayət işi üzrə məhkəmə prosesi başlayıb.

Bakı Ağır Cinayətlər Məhkəməsində hakim Şəlalə Həsənovanın sədrliyi ilə keçirilən hazırlıq iclasında təqsirləndirilən şəxsin anket məlumatları dəqiqləşdirilib. Məhkəmədə Favzan Musa Xan dövlət hesabına tərcüməçi və vəkillə təmin edilib.

İttiham olunan əcnəbi haqqında seçilmiş həbs qətimkan tədbiri qüvvədə saxlanılaraq işin məhkəmə baxışına verilməsi haqda qərar qəbul edilib. İlk məhkəmə baxış iclası iyunun 25-nə təyin edilib. İttiham aktında göstərilir ki, Əfqanıstan Respublikasının vətəndaşı, 1990-cı il təvəllüdlü Favzan Musa Xanın digər şəxslərlə qabaqcadan əlbir olaraq ölkə ərazisində ictimai sabitliyi pozmaq, əhali arasında vahimə yaratmaq, dövlət hakimiyyət orqanları və beynəlxalq təşkilatlar tərəfindən qərar qəbul edilməsinə təsir göstərmək məqsədli terror aktları törətmək planları olub. Partlayış, yanğın və ya digər bu kimi hadisələrlə müşayiət olunacaq təhlükəli halların baş verməsi ilə nəticələnəcək terror aktları törətməyi planlaşdıran əcnəbi məhz bu səbəbdən Azərbaycana gəlib.

O, Bakıda yaşadığı müddətdə istintaq sirri olduğundan adı açıqlanmayan üçüncü dövlətin ölkəmizdəki səfirliyinin yerləşdiyi ərazinin koordinatlarını müəyyənləşdirmək və terror aktını planlaşdırmaq məqsədilə səfirliyin binasının ətrafında müşahidələr aparıb. Favzan Musa Xan terror aktında iştirak edə biləcək şəxslərlə də əlaqəyə girərək sövdələşib.

Qeyd edək ki, o, cinayət başında saxlanılaraq təqsirləndirilən şəxs qismində məsuliyyətə cəlb olunmaqla barəsində məhkəmənin qərarı ilə həbs qətimkan tədbiri seçilib.

Faktla bağlı Dövlət Təhlükəsizliyi Xidmətinin İstintaq Baş İdarəsində cinayət işi başlanılıb.