Əfqan vətəndaşı səfirlik binasında terror aktı törətmək istəyib

İyulun 10-da paytaxt Bakıda terror aktı törətməyə hazırlaşan Əfqanıstan vətəndaşı həbs edilib.

Əməliyyatı keçirən Dövlət Təhlükəsizliyi Xidmətinin məlumatında bildirilib ki, saxlanılan şəxs 1990-cı il təvəllüdlü Favzan Musa Xan adlı şəxsdir. Onun Azərbaycan ərazisində terrorçuluq hərəkətlərinin törədilməsinə hazırlıq gördüyünə dair məlumat əldə edilib. Bundan başqa, Favzan Musa Xanın üçüncü ölkənin Bakıdakı səfirliyinə qarşı terror hücumu planlaşdırdığı qeyd olunsa da, hansı ölkənin diplomatik nümayəndəliyinin hədəf alındığı açıqlanmamışdı. Yayılan görüntülərdə isə həmin şəxsin İsrailin Bakıdakı səfirliyinin yaxınlığında həbs edildiyi əks olunub.

İsrailin “i24 news” xəbər kanalında dərc edilən yazıda müəllif iddia edir ki, hazırlanan bu cinayətdə İran dəst-xətti aydın hiss olunur. Əsas ipucu kimi isə Favzan Musa Xanın Əfqanıstan vətəndaşı olması göstərilir. Belə ki, SEPAH minlərlə əfqanı Suriyadakı vətəndaş müharibəsinə cəlb edərək onları silahlandırıb, daha sonra isə Yaxın Şərqdəki qaynar nöqtələrə göndərib.

Müəllif xatırladır ki, əfqanlardan təşkil edilən “Fatimiyyun” hərbi birləşməsi Suriyada və Livanda İranın əsas proksi qüvvəsi kimi müxtəlif tapşırıqları yerinə yetirib.

Yazıda Azərbaycan ərazisində İsrailə qarşı planlaşdırılan bir neçə terrora cəhd faktları da sadalanır. Qeyd edilir ki, hələ 2007-ci ildə İsrailin Bakıdakı səfirliyinə və Rusiyanın icarəyə götürdüyü Qəbələ Radiolokasiya Stansiyasına hücum planlaşdırdıqlarına görə 12 ildən 15 ilədək həbs cəzası alan şəxslər də İranın təlimatlandırdığı Livan vətəndaşları olub.

“2012-ci ildə Bakıda işləyən israillilərə və digər əcnəbilərə qarşı hücumlar planlaşdıran üç terrorçudan da birinin İran vətəndaşı olduğu sübuta yetirilmişdi. Beləliklə, zəncirin halqalarını birləşdirərkən cinayətin İranın xüsusi xidmət orqanları tərəfindən planlaşdırıldığı şübhə doğurmur”, – deyə yazıda vurğulanır.