Bakıda yeraltı keçiddə eskalator qırıldı - Baku TV

Paytaxtın Yasamal rayonu, 20 nömrəli tam orta məktəbin yaxınlığındakı yeraltı keçiddə eskalatorun qırılması və bir neçə nəfərin xəsarət alması ilə bağlı xəbərlər yayılıb.

Baku TV-nin çəkiliş qrupu dərhal hadisə yerinə yollanıb. Araşdırma zamanı məlum olub ki, hazırda sözügedən eskalator işləmir və təhlükəsizlik məqsədilə fəaliyyəti məhdudlaşdırılıb.

Ərazidə növbədə duran nəzarətçi yayılan məlumatı təsdiqləyərək bildirib: “Eskalator öz-özünə dayandı. Üzərində 3 nəfər var idi, müvazinətlərini itirib yerə yıxıldılar”.

Lakin sahə rəisi iddiaları təkzib edib: “Orada elə bir hadisə baş verməyib. Sadəcə olaraq bir vətəndaş müvazinətini itirərək yıxılıb. Bu səbəbdən eskalatorun işini müvəqqəti dayandırmışıq”.

Məsələ ilə bağlı Tibbi Ərazi Bölmələrini İdarəetmə Birliyindən bildirilib ki, Respublika Təcili və Təxirəsalınmaz Tibbi Yardım Mərkəzinə Yasamal rayonu, M.Müşfiq küçəsi, İncəsənət Gimnaziyası yaxınlığından təcili çağırış daxil olub:

“Çağırış ünvanına təcili tibbi yardım briqadası cəlb olunub. Təcili tibbi yardım briqadası tərəfindən 2 nəfər (qadın) Kliniki Tibbi Mərkəzə təxliyə olunub”.