Bakıdakı villada partlayışın səbəbi üzə çıxdı | Evdəki ustalardan biri... - Baku TV

Bakının Sabunçu rayonu Bakıxanov qəsəbəsində yerləşən fərdi yaşayış evində baş verən partlayışın təfərrüatı məlum olub.

İlkin məlumata görə, dördmərtəbəli villanın birinci mərtəbəsində yerləşən hovuzun altından keçən qaz xəttində sızma baş verib. Xəsarət alan şəxslər villada işləyən ustalar olublar.

Respublika Təcili və Təxirəsalınmaz Tibbi Yardım Mərkəzindən verilən məlumata görə, dekabrın 9-u 2025-ci il tarixində saat 10:00 radələrində Respublika Təcili və Təxirəsalınmaz Tibbi Yardım Mərkəzinə Sabunçu rayonu, Bakıxanov qəsəbəsi ərazisindən partlayış baş verməsi səbəbi ilə çağırış qeydə alınıb.

Çağırış ünvanına təcili tibbi yardım briqadası cəlb olunub. Təcili tibbi yardım briqadası tərəfindən 1 nəfər bədənin müxtəlif nahiyələrinin yanığı diaqnozu ilə Yanıq Mərkəzinə, digər şəxs isə travma və yanıq diaqnozu ilə Sabunçu Tibb Mərkəzinə hospitalizasiya olunub.

Sabunçu Tibb Mərkəzindən verilən məlumata görə, tibb mərkəzinin Anesteziologiya-reanimasiya və intensiv terapiya şöbəsinə yerləşdirilən şəxsə bud sümüyünün sınığı, sağ bazu sümüyünün sınığı, sol çiyin çıxığı, ağır kəllə-beyin travması, üzün və ətrafların II dərəcəli yanığı diaqnozları təyin edilib. Aparılan reanimasiya tədbirlərinə baxmayaraq, onun ölüm faktı qeydə alınıb.