Bakının mərkəzində azyaşlı dəhşət yaşadı | Sürücünün biganəliyi müzakirələrə səbəb oldu

Bakının mərkəzində azyaşlının ağır xəsarət alması ilə nəticələnən hadisənin təfərrüatı məlum olub.

Ağır yaralanan uşağın fotosunu paylaşan bloger Saleh Nəsirov hadisə barədə bəzi məlumatları bölüşüb.

Bildirib ki, hadisə dekabrın 25-i baş verib. Sərxan adlı 10 yaşlı oğlan başından yaralanıb və Mərkəzi Klinik Xəstəxananın Reanimasiya şöbəsinə yerləşdirilib.

“Uşaq beyin travması alıb. Onu polis əməkdaşları vaxtında xəstəxanaya çatdırıblar. Maşınla vuranlardan “Sedan” avtomobilinin sahibi ilk gündən maraqlanır. Lakin “Mercedes ML” markalı avtomobilin sürücüsü dünən gəlib. Həmin gün məktəbdə bayram tədbiri keçirilib və Sərxana hədiyyə verilib. O, səkidə dayanıb hədiyyəsinə baxarkən bədbəxt hadisə ilə üzləşib”, – deyə bloger qeyd edib.

Xatırladaq ki, hadisə vaxtı ilk olaraq aşan yol nişanı uşağa dəyib. Sosial şəbəkələrdə baş verən qəza, xüsusilə “Mercedes”in sürücüsünün xəsarət alan azyaşlıya biganəliyi geniş müzakirələrə səbəb olub.