Baş Prokurorluq kinostudiyanın ərazisindəki partlayışla bağlı təcili məlumat yaydı

Cəfər Cabbarlı adına “Azərbaycanfilm” kinostudiyası ərazisində baş verən partlayışla bağlı Baş Prokurorluqda araşdırma aparılır.

Bu barədə qurumun mətbuat xidmətindən məlumat verilib.

Qeyd olunub ki, iyunun 26-da saat 23:00 radələrində kinostudiya ərazisində yanğınla müşayiət olunan partlayış hadisəsinin baş verməsi barədə məlumat daxil olub.

Baş Prokurorluğunun Kriminalistika və informasiya texnologiyaları idarəsi əməkdaşları tərəfindən Fövqəladə Hallar Nazirliyinin və Ədliyyə Nazirliyinin Məhkəmə Ekspertiza Mərkəzinin mütəxəssislərinin iştirakı ilə hadisə yerinə baxış keçirilib, hadisənin baş vermə səbəblərinin müəyyən edilməsi məqsədilə ekspertizalar təyin edilib və təxirəsalınmaz zəruri prosessual hərəkətlər icra olunub.

İlkin araşdırma zamanı müəyyən edilib ki, kinostudiyanın ərazisində yerləşən, film istehsalı zamanı partlayış, yanğın, atəş və tüstü effektlərinin icrası üçün nəzərdə tutulan pirotexniki vasitələrin saxlanc anbarında yanğınla müşayiət olunan partlayış hadisəsinin baş verməsi nəticəsində həmin birmərtəbəli tikili dağılıb, kinostudiyanın inzibati binası və yaxınlıqda yerləşən yaşayış binasının müəyyən mənzillərinin pəncərələrinə isə ziyan dəyib.

Hadisə nəticəsində xəsarət alan olmayıb.

Araşdırmanın nəticəsi barədə ictimaiyyətə əlavə məlumat veriləcək.