Benzinlə ehtiyatsız davranış bədbəxt hadisəyə səbəb oldu

Lerikdə benzinlə ehtiyatsız davranma 2 yaşlı uşağın yanmasına, ata və ananın xəsarət almasına səbəb olub.

Hadisə rayonun Şinəbənd kəndində baş verib. Kənd sakini 37 yaşlı Rüfət Abbasov evdə odun peçini qalamaq üçün benzindən istifadə edib. Bu zaman peçdən çıxan alov ətrafa və yaxınlıqda olan 2 yaşlı Vüqar Abbaslının üzərinə düşüb.

Azyaşlının anası 35 yaşlı Afiqə Qasımova dərhal uşağın paltarlarını çıxarmağa çalışıb. Həmin anda ana da yanıq xəsarətləri alıb.

Lənkəran Rayon Mərkəzi Xəstəxanasına yerləşdirilən azyaşlıya zəruri ilkin tibbi yardım göstərildikdən sonra reanimasiya şöbəsinə yerləşdirilib. Hazırda uşağın vəziyyəti ağır qiymətləndirilir.

Faktla bağlı araşdıma aparılır.