Beşotaqlı evdə yanğın baş verdi

Zərdabda fərdi yaşayış evində yanğın olub. Hadisə rayonun Məmmədqasımlı kəndində sahəsi 350 m² olan 5 otaqdan ibarət kürsülü evdə qeydə alınıb.

Ev sahibi Hafiz Cavadov gecə saat 04:00 radələrində yanğın səsinə oyanıb və həyat yoldaşı ilə birlikdə dərhal evi tərk edib. Yanğının söndürülməsi üçün köməyə qonşular və yaxın qohumlar gəlsə də, alovun şiddətindən onu söndürmək mümkün olmayıb. Nəticədə ev içərisindəki əşyalarla birgə yanaraq külə dönüb.

Hadisə yerinə Fövqəladə Hallar Nazirliyinin Zərdab Rayon Dövlət Yanğından Mühafizə Hissəsinin canlı qüvvəsi və texnikaları cəlb olunub. Yanğın söndürülüb və qonşu evlərə keçməsinin qarşısı alınıb.

Ev sahibinin sözlərinə görə, yanğın elektrik naqillərində yaranan qısaqapanmadan qaynaqlanıb və ona ümumilikdə 100 min manatdan çox maddi ziyan dəyib. Hazırda yanğının dəqiq səbəbləri araşdırılır.