Biləsuvardakı partlayışın təfərrüatı: bir ailənin faciəsi

Biləsuvarda yaşayış binasında baş verən partlayışın təfərrüatı məlum olub.

Belə ki, hadisə kirayədə yaşayan rayon sakini 1988-ci il təvəllüdlü Günay Əliyeva mənzilə daxil olan zaman baş verib. Onun meyiti dağıntılar altından çıxarılıb. Həmin vaxt onun yanında övladları – 14 yaşlı Fərqanə Əliyeva və 10 yaşlı Yusif Əliyev də olub.

TƏBİB-in məlumatına görə, vəziyyəti orta ağır olan 14 yaşlı qızın müalicəsi rayon xəstəxanasında davam etdirilir. Vəziyyəti daha ağır olan 10 yaşlı oğlan isə hazırda Bakıda yerləşən müvafiq tibb müəssisəsinə aparılıb. Hadisə vaxtı qadının həyat yoldaşı həyətdə olduğundan o, xəsarət almayıb.

FHN-dən bildirilib ki, mənzildə partlayışa səbəb qaz sızması olub. Partlayışın baş verdiyi beşmərtəbəli binada yaşayan 37 ailə təxliyə edilərək müvəqqəti olaraq Olimpiya Kompleksinə yerləşdirilib. Təhlükəsizlik tədbirləri nəticəsində binaya kommunal xidmətlərin verilməsi tam dayandırılıb. Partlayış yerinə hüquq-mühafizə orqanları, FHN-in yanğınsöndürmə briqadası və xilasedicilər cəlb olunub.

Həmçinin faktla bağlı Biləsuvar Rayon Prokurorluğunda Cinayət Məcəlləsinin ağır nəticələrə səbəb olan səhlənkarlıq maddəsi ilə cinayət işi açılıb.