Boya zavodundakı güclü yanğının əsas səbəbi | FHN hadisə yerində

Abşeron rayonunun Güzdək qəsəbəsində fəaliyyət göstərən boya zavodunda güclü yanğın hadisəsi baş verib.

Yanğınla mübarizəyə Fövqəladə Hallar Nazirliyinin Dövlət Yanğından Mühafizə Xidməti və Xüsusi Riskli Xilasetmə Xidmətinin ümumilikdə 20 ədəd texnika və 100 nəfərdən artıq canlı qüvvəsi cəlb olunub.

Hadisə yerinə gələn əməkdaşlar havanın küləkli və yanğının mürəkkəb olmasını nəzərə alaraq 2 saylı çağırış edib. Çağırışa uyğun olaraq qüvvələr hadisə yerinə cəlb edilib. Yanğın 1 hektar ərazini əhatə edib. Ərazidə 11 müxtəlif təyinatlı binalar – anbar, istehsalat sexi, inzibati bina və digər müxtəlif tikililər mövcuddur.

Qeyd edək ki, yanğın baş verən əraziyə 7 təcili tibbi yardım briqadasının əməkdaşları da cəlb olunub. TƏBİB-dən verilən məlumata görə, tibbi yardım briqadası tərəfindən 6 nəfər tüstüdən zəhərlənmə səbəbi ilə Kliniki Tibbi Mərkəzin Toksikologiya şöbəsinə hospitalizasiya olunub. Zəruri tibbi yardım göstərildikdən sonra ambulator müalicə üçün evə buraxılıblar. Bir nəfərə sağ əlinin yanığı, bir nəfərə isə özünü pis hiss etməsi səbəbi ilə yerində tibbi yardım göstərilib.