Burada dəfələrlə yanğın olub, amma... | Evləri yanan ailə çətin vəziyyətdə qaldı

Samuxda yanğın hadisəsi baş verib.

Gecə saat 4 radələrində rayonun Köbər kəndində başlayan yanğın qısa müddətdə mənzili tam yararsız hala salıb. Nəticədə 7 nəfərlik ailə evsiz qalıb.

Alovu söndürmək istəyərkən ev sahibi xəsarətlər alıb.

“Uşaq çıxıb dedi ki, ay nənə, evimiz alışıb yandı. Yuxudan durub mətbəxə getdim, gördüm ki, alov artıq göyə qalxıb. Nə qədər su tökdük, nə qədər çalışdıq, ancaq söndürmək mümkün olmadı. 50 ildə çəkdiyim əziyyət 40 dəqiqəyə yoxa çıxdı”, – çarəsiz qalan ev sahibi Abid Qasımov deyib.

Fövqəladə Hallar Nazirliyindən verilən məlumatda bildirilib ki, ümumi sahəsi 180 kvadratmetr olan kürsülü, birmərtəbəli 4 otaqlı evin yanar konstruksiyaları yanıb. Yaxınlıqdakı ev yanğından mühafizə olunub. Yanğın yanğından mühafizə bölmələri tərəfindən söndürülüb. Hadisənin başvermə səbəbləri araşdırılır.