Cəlilabadda bıçaqlanma hadisəsi | Saxlanılanlar var
Cəlilabadın Alar kəndində 3 yeniyetmə kənd sakininin iştirakı ilə bıçaqlanma hadisəsi baş verib.
Belə ki, yaxınlarına məxsus dönərxana və kafe tipli obyektdə olan 15 yaşlı Fuad Məmmədovla digər kənd sakini olan 17 yaşlı Həsən Salamzadə və 18 yaşlı İsaxan Nağıyev arasında naməlum səbəbdən mübahisə düşüb. Dönərxana qarşısında başlayan söz-söhbət yaxınlıqdakı digər obyektdə davam edib. Yeniyetmələr məhz burada mübahisələrini bıçaqla həll etməyə çalışıblar.
Hadisə zamanı ağır xəsarət alan Həsən Salamzadə Biləsuvar Rayon Mərkəzi Xəstəxanasına, İsaxan Nağıyev isə Cəlilabad Rayon Mərkəzi Xəstəxanasına çatdırılıb.
Daxili İşlər Nazirliyinin Mətbuat Xidmətinin Lənkəran regional qrupundan 2 yeniyetməyə kəsilmiş-deşilmiş xəsarətlər yetirməkdə şübhəli bilinən Fuad Məmmədovun saxlanıldığı bildirilib. Faktla bağlı araşdırmalar aparılır.