Dedi ki, Ətağa atandan yaxşı kişidir | İş yoldaşını qətlə yetirən şəxsə hökm oxundu

Sabunçu Rayon Prokurorluğunda Cinayət Məcəlləsinin 120.1-ci maddəsi ilə ittiham olunan Elşən Məmmədov barəsində açılan cinayət işi başa çatıb.

İstintaqla müəyyən edilib ki, 2024-cü il aprelin 19-u saat 21 radələrində Elşən Məmmədov sərxoş halda çilingər işlədiyi "Bakıxanov" çörək zavodunun həyətinə gəlib, orada təsadüfən rastlaşdığı, həmin zavodda qazanxana operatoru işləyən Etibar Salamzadə ilə birlikdə yenidən spirtli içki qəbul edib. Daha sonra onlar arasında mübahisə yaranıb.

Aralarındakı mübahisədən hiddətlənən Elşən Məmmədov xidməti otağına gedərək oradan məişət təyinatlı bıçaq götürüb. Daha sonra Etibar Salamzadəyə yaxınlaşıb, onun döş qəfəsinə və qarnına 2 bıçaq zərbəsi vuraraq qətlə yetirib. Yaralı xəstəxanaya aparılarkən yolda dünyasını dəyişib.

Məhkəmə iclasında Elşən Məmmədov ittiham üzrə özünü qismən təqsirli bilib. O deyib ki, Etibar Salamzadə ilə münasibəti pis olmayıb. Sadəcə ünvanına işlətdiyi söyüşə görə özünü idarə edə bilməyib.

Dövlət ittihamçısı təqsirləndirilən şəxsə 18 il cəza təyin edilməsini istəyib.

Bakı Ağır Cinayətlər Məhkəməsinin hökmü ilə Elşən Məmmədov Cinayət Məcəlləsinin 120.2.2-ci maddəsi ilə təqsirli bilinərək 17 il müddətinə azadlıqdan məhrum olunub.