Təklif etdi ki, bir butulka da alıb içək... | Məşhur çörək zavodunda qandonduran qətl

"Bakıxanov" çörək zavodunda iş yoldaşını qətlə yetirməkdə təqsirləndirilən Elşən Məmmədovun cinayət işi üzrə məhkəmə baxışı keçirilib.

Bakı Ağır Cinayətlər Məhkəməsinin hakimi Cavid Hüseynovun sədrliyi ilə baş tutan prosesdə dövlət ittihamçısı Vüsal Mehrəliyev ittiham aktını elan edib. Təqsirləndirilən şəxs ona qarşı irəli sürülən ittihamla özünü qismən təqsirli bilib.

Daha sonra məhkəmədə sərbəst ifadə verən Elşən Məmmədov mərhumu qətlə yetirmək fikrində olmadığını bildirərək, hadisəni sərxoş halda, anlaqsız vəziyyətdə törətdiyini deyib.

Elşən Məmmədov hadisəni törətdikdən sonra könüllü polisə təslim olub. Məhkəmədə ifadə verən zərərçəkmiş şəxsin hüquqi varisi Tahir Salamzadə isə təqsirləndirilən şəxsin yanlış ifadə verdiyini deyib.

Məhkəmənin növbəti iclası sentyabrın 6-na təyin edilib.

Qeyd edək ki, hadisə 2024-cü ilin aprelində paytaxtın Sabunçu rayonunda baş verib. Belə ki, Bakıxanov qəsəbəsində 1990-cı il təvəllüdlü Etibar Salamzadə işlədiyi "Bakıxanov" çörək zavodunda iş yoldaşı Elşən Məmmədovla mübahisə edib. Daha sonra hər iki şəxs zavoddan çıxaraq küçədə əlbəyaxa dava ediblər. Elşən Məmmədov Etibar Salamzadəyə bıçaq zərbələri endirib. Etibar Salamzadə xəstəxanaya aparılarkən yolda dünyasını dəyişib.

Elşən Məmmədov hüquq-mühafizə orqanlarının əməkdaşları tərəfindən şübhəli şəxs qismində saxlanılıb. Ona qarşı Cinayət Məcəlləsinin xuliqanlıq niyyəti ilə qəsdən adam öldürmə maddəsi ilə ittiham irəli sürülüb.