DİN-dən Qaradağ rayonunda əməliyyat | Tarixi abidələri talayanlar saxlanıldı - Baku TV

Azərbaycanın tarixi irsinə qəsd edən cinayətkar dəstə ifşa olunub. Baku TV-nin "Hadisə" rubrikasında yayımlanan məlumata görə, Daxili İşlər Nazirliyi (DİN) Qaradağ rayonu ərazisində xüsusi əməliyyat keçirib. Əməliyyat nəticəsində dövlət tərəfindən xüsusi qorunan Qobustan Milli Tarix-Bədii Qoruğu ərazisinə qanunsuz daxil olaraq, tarixi qayaların dibində qazıntı işləri aparan 5 nəfər saxlanılıb.

Daxili İşlər Nazirliyinin mətbuat xidmətindən verilən məlumata görə, qabaqcadan əlbir olan bu şəxslər — Kamil Ömərov, Məmmədrəsul İbrahimov, Əkbər Əkbərov, Niyaməddin Əliyev və Elşad İsgəndərov qoruq ərazisində qızıl və digər qiymətli əşyalar tapmaq məqsədilə qeyri-qanuni arxeoloji qazıntılar aparıblar. Bu fəaliyyət nəticəsində dünya əhəmiyyətli mədəni sərvət hesab olunan qədim qayalara və tarixi təbəqələrə ciddi ziyan dəyib. Maraqlı məqam ondan ibarətdir ki, saxlanılan şəxslər öz cinayətkar əməllərini mobil telefon vasitəsilə videoya da çəkiblər. Videoda DİN əməkdaşlarının saxlanılma anı, istifadə olunan qazıntı alətləri və zərər görmüş tarixi ərazi nümayiş etdirilir.