DİN-dən xüsusi əməliyyat | Narkoşəbəkənin əməlləri ortaya çıxdı

Azərbaycana qeyri-leqal yollarla gətirilən 36 kiloqram narkotik vasitə aşkarlanıb.

Bu barədə Daxili İşlər Nazirliyindən məlumat verilib.

Bildirilib ki, qurumun Baş Narkotiklərlə Mübarizə İdarəsinə növbəti dəfə külli miqdarda narkotiklərin ölkəyə qeyri-leqal yollarla gətirildiyi barədə əməliyyat məlumatı daxil olub.

Narkotiklərin ölkə ərazisində daşınması, ünvanlara çatdırılması və satış şəbəkəsini quran şəxsin müəyyən edilməsi məqsədilə xüsusi əməliyyat planı hazırlanaraq həyata keçirilib.

Lənkəran rayonundan başlayan əməliyyata paytaxtın Sabunçu rayonunda yekun vurulub.

Narkoşəbəkənin ölkə üzrə əsas üzvlərindən olan, əvvəllər də narkotik və digər cinayətlərə görə dəfələrlə məhkumluq yaşamış 31 yaşlı Elgün Əliyev saxlanılıb. Onun evindən və sərnişin kimi əyləşdiyi avtomobildən 36 kiloqrama yaxın tərkibi psixotrop maddələrlə zənginləşdirilmiş marixuana aşkarlanıb. O, marixuananı şəxsiyyəti istintaqla araşdırılan İran vətəndaşının vasitəsilə əldə etdiyini etiraf edib.

Faktla bağlı cinayət işi başlanılıb, saxlanılan şəxs barəsində məhkəmənin qərarı ilə həbs qətimkan tədbiri seçilib.