Direktor tapşırırdı ki... | Novxanıdakı reabilitasiya mərkəzində nə baş verir?

Alkoqolizmdən əziyyət çəkən Elvin Eyvazovun müalicə üçün yerləşdirildiyi reabilitasiya mərkəzlərindən birində işgəncələrə məruz qalması barədə sosial şəbəkələrdə məlumatlar yayılıb.

Elvin Eyvazov Baku TV-yə açıqlamasında zorakılığa məruz qaldığını təsdiqləyib:

“Mərkəzin direktoru, proqram rəhbəri və orada müalicə alan bəzi şəxslər tərəfindən döyülürdüm. Məni hovuza atırdılar, əl-qolumu bağlayırdılar, taxtanı belimdə qırırdılar. Üzüm, gözüm şiş, qan içində olduğuna görə ailəmlə görüntülü danışa bilmirdim. Zəng edəndə üzümü göstərməmək üçün deyirdilər ki, guya internet kəsilib. Məndən başqa burada bir-iki nəfərə də belə təzyiq göstərirdilər”.

Məsələ ilə bağlı Daxili İşlər Nazirliyindən bildirilib ki, araşdırma zamanı mərkəzin təsisçiləri, eləcə də əməkdaşları Emin Əliyev və Orxan Şirinov müalicə müddətində Elvin Eyvazova psixi və fiziki zor tətbiq etmədiklərini bildiriblər:

“Reabilitasiya mərkəzində müalicə alan Şamil İbrahimov isə izahatında həmin gün E.Eyvazovun aqressiv hərəkətlər etməsi səbəbindən ona irad bildirdiyini və qolundan tutaraq masaya əyləşdirdiyini bildirib.

Araşdırmaların yekunu olaraq 17 iyun 2024-cü il tarixində reabilitasiya mərkəzində Şamil İbrahimovun orada müalicə alan E.Eyvazovun sifət və qol nahiyələrinə xəsarət yetirməsi nəticəsində sağlamlığa zərər vurmayan bədən xəsarəti yetirdiyi sübuta yetirilib. Şamil İbrahimovun hərəkətində cinayət tərkibi müəyyən olunmadığından toplanmış material üzrə cinayət işinin başlanması rədd edilərək barəsində inzibati tənbeh tədbirləri görülüb”.